Lugo é a segunda capital de provincia en España con bonobús máis barato, segundo un estudo

Buses urbanos de Lugo | Nexotrans
Buses urbanos de Lugo | Nexotrans

A diferenza de prezo na viaxe en autobús urbana utilizando un bonobús chega a alcanzar o 307% naquelas cidades onde existe esta modalidade. Esta é unha das conclusións do estudo anual realizado por FACUA-Consumidores en Acción, no que se pon de manifesto que, en 2019, Madrid, Xirona e Barcelona son as cidades coas tarifas de autobús máis caras nesta modalidade das 53 analizadas, das que Lugo é a segunda máis barata.

O estudo abarca a totalidade das 50 capitais de provincia -agás Pontevedra, que non conta cun sistema de autobús urbano como tal- máis Ceuta, Melilla, Santiago de Compostela e Xixón.

De media, viaxar en autobús utilizando un bonobús ou cartón recargable con transbordo (o que ofrecen case todas as cidades analizadas (en concreto 39) custa 0,75 euros, unha leve baixada do 0,7% con respecto ao ano pasado.

O traxecto máis caro con este cartón con transbordo é o de Madrid (1,83 euros), seguido polo de Xirona (1,07 euros), Barcelona (1,02 euros), Lleida (0,98 euros) e Alacante (0,87 euros). No outro extremo, as viaxes máis baratas atópanse en Lugo (0,45 euros), Logroño (0,53 euros), Ávila (0,55 euros), Salamanca (0,59 euros) e Santiago de Compostela, Segovia e Vitoria (as tres cun prezo de 0,60 euros).

En canto aos traxectos con bonobús sen transbordo (do que dispoñen 25 das 53 cidades), Madrid continúa sendo a cidade máis cara (1,22 euros). Séguenlle Palma de Mallorca (1,00 euros), San Sebastián (0,95 euros), Oviedo (0,90 euros) e Huesca (0,85 euros). As máis baratas son Palencia (0,40 euros), Lugo (0,45 euros), Burgos (0,47 euros) e Logroño (0,53 euros).