A Deputación de Lugo deseña un orzamentos con maior dedicación ao ‘Plan Único’

Rolda de prensa tras a xunta da Deputación de Lugo.

Os dous socios de goberno na Deputación de Lugo, PSOE e BNG, pretenden levar o proxecto de orzamentos do próximo ano ao pleno do mes de novembro, para que entren en vigor o 1 de xaneiro de 2020. Así o trasladaron tras a xunta de goberno provincial, tanto a portavoz socialista do bipartito, Pilar García Porto, como a vicepresidenta provincial, a nacionalista Maite Ferreiro.

García Porto explicou que xa se traballa “nas liñas básicas” do borrador, nuns orzamentos onde de novo cobrará “un maior” protagonismo o Plan Único na repartición de fondos para os 67 concellos da provincia “sen condicionantes”.

Con respecto ao plan, Porto xa avanzou que “non se adelgazará” e que espera o mesmo grao de compromiso cos concellos de Lugo doutras administracións como a Xunta de Galicia.

A vicepresidenta da institución, Maite Ferreiro, apelou á “importancia” de ter un orzamento “para empezar a aplicalo a partir do 1 de xaneiro” do próximo ano.

“Estamos a traballar nas nosas áreas (as que dirixen os nacionalistas) para ver as principais necesidades, o que se pode facer e distintos programas, e depende tamén das demandas que se nos trasladen dos distintos concellos para loxicamente dar resposta a esas demandas”, concluíu Ferreiro.