Feijóo avisa que non vai haber AVE en Lugo en 2021

Cualifica de "incorrecta" a data que anunciou o ministro Ábalos durante un mitin na cidade.

O presidente da Xunta de Galicia, Alberto Núñez Feijóo, nun acto en Lugo.

O presidente da Xunta de Galicia, Alberto Núñez Feijóo, argumentou que 2021 “era o compromiso” de conexión de Lugo coa alta velocidade ferroviaria, pero que a día de hoxe é “inasumible” debido ao actual nivel de execución das obras.

Por iso, cualificou este luns de “incorrecta” a data que anunciou este fin de semana o ministro de Fomento en funcións, José Luís Ábalos, durante un mitin no que apelou a un investimento de 239 millóns de euros na electrificación Ourense-Lugo-Monforte para ter a dita “conexión” nese horizonte.

Nun acto tamén na cidade das murallas, o titular do Executivo autonómico dixo que “oxalá se puidese ter o AVE nas datas comprometidas polo Goberno de Rajoy”. “Pero eu son presidente da Xunta de Galicia e non podo confirmar esa data”, subliñou.

“Gustaríame confirmala porque sería o cumprimento dun compromiso do Goberno central co Goberno galego, pero eu non vou a enganar aos lucenses. Neste momento, co nivel de obra, moi escasa, licitada e con ningunha obra iniciada, eu creo que non hai ninguén que poida confirmar que o tren de alta velocidade unirá Lugo con Ourense en 2021“, avisou.

Feijóo insistiu en que “esa data” non a pode “ratificar” porque na súa opinión é “incorrecta” e non vai haber “AVE en Lugo no ano 2021”. “E ben que o sinto”, apostilou.

“A data de hoxe, o que diga isto que comigo non conte, eu non vou enganar aos lucenses. Ese era o compromiso, neste momento ese compromiso coa información e o nivel de execución que temos é un compromiso inasumible”, concluíu o presidente galego.