As Indicacións Xeográficas Protexidas Tenreira Galega e Vaca Galega/Boi Galego celebrarán en Lugo unha xornada técnica conxunta sobre a situación da produción e comercialización da carne de vacún de calidade.
Segundo informaron os organizadores, a cita terá lugar no Pazo de Feiras e Congresos de Lugo o venres 25 de outubro. Este encontro vai dirixido a gandeiros, profesionais técnicos, industria, distribución e consumidores.
A xornada, avanzaron os organizadores, “pretende informar sobre a situación actual da produción e comercialización da carne de vacún de calidade nun escenario no que se lle presta especial atención ao benestar animal e á protección ambiental”.
Destes temas falarase durante as sesións, así como doutros aspectos como a bioseguridade nas gandarías de vacún e o uso responsable de antibióticos; os contratos alimentarios no sector; ou a situación actual dos mercados e a evolución do consumo de carne de vacún.
