Natxo Lezkano: “Temos que mellorar as nosas porcentaxes de tiro”

O primeiro adestrador de Cafés Candelas Breogán explicou que Elijah Millsap "está cada día unha miguiña mellor" e "está a traballar ben"

Natxo Lezkano. Foto de ACB.

Natxo Lezkano, primeiro adestrador de Cafés Candelas Breogán, analizou o partido deste sábado contra Delteco Gipuzkoa Basket no Donostia Arena de Donostia-San Sebastián a partir das 18 horas.

Lezkano explicou que “é un partido moi, moi importante, é unha final” e teñen “a obriga de gañar para cumplir o obxectivo da permanencia”. Porén, teñen que “saír moi concentrados” e “neste tipo de partidos hai que ir a morte”. Na súa opinión, “defensa e rebote teñen que seguir sendo as señas de identidade” do equipo lucense. “Se queremos gañar fóra, temos que mellorar as nosas porcentaxes de tiro, é o noso cabalo de batalla”, comentou, non sen antes aclarar que esa mellora debe ser en “tiros de dous e de tres puntos”. Valorou que “o equipo está ben a nivel físico”. O primeiro adestrador de Cafés Candelas Breogán explicou que Elijah Millsap “está cada día unha miguiña mellor” e “está a traballar ben”. Iso sí, reflexionou que teñen “xogadores importantes que están un pouco irregulares en ataque, tema de Lucio Redivo e Johan Löfberg”.

O primeiro técnico breoganista contestou que “non” vai reaparecer Henk Norel en Donostia. “A miña idea hoxe en día é que prosiga a súa recuperación”. Pola súa banda, adiantou a mellora de Aleksandar Cvetković, aqueixado previamente de problemas na espalda. En canto a Tadija Dragićević, “a mellora xa é importante, non hai restos da rotura, ten que cicatrizar e comezar o proceso de correr e ir facendo máis cousas”.

 

DEIXAR UN COMENTARIO

Please enter your comment!
Please enter your name here