As perdas e un parcial 0-16 derrotan a Breogán no derradeiro cuarto (72-90)

Os breoganistas competiron os tres primeiros cuartos chegando a vencer por un punto ao remate do terceiro parcial

Luca Vildoza pasa o balón ante Volodymyr Gerun. Foto de ACB.

Cafés Candelas Breogán perdeu ante Kirolbet Baskonia (72-90) despois de competir nos primeiros tres cuartos. Ao remate do terceiro parcial, os lucenses gañaban por un punto (58-57). Dende aí, o Breogán cometeu excesivas perdas (8) e  Baskonia castigou nas transicións con 11 puntos de Marcelinho Huertas nese treito.

No primeiro cuarto, o Breogán abusou dos lanzamentos de tres puntos errando nove. Alec Brown destacaba sobremaneira en ámbalas dúas pistas. Baskonia rematou o primeiro cuarto por diante (14-19) grazas, en parte, a dúas triplas do fino zurdo Shavon Shields.

No segundo cuarto, os lucenses equilibraron o partido dende a defensa e unha mellor xestión do balón coa dirección de Ricardo Úriz ante un Baskonia que forzaba faltas, pero que no primeiro tempo fallou seis tiros libres. Os lucenses adiantáronse no marcador en catro ocasións e chegaron ao descanso con empate (39-39) tras unha penetración do baskonista Shields.

O Breogán seguiu competindo e chegou ao derradeiro cuarto un punto por riba (58-57). No derradeiro cuarto: parcial de 0-16 de Baskonia. Os lucenses reduciron despois dun dous máis un dun inspirado Elijah Millsap (69-79), pero Baskonia volveu castigar até o 72-90 final.

Os máximos anotadores foron Volodymyr Gerun polos lucenses, con 14 puntos, e Darrun Hilliard por Baskonia, con 21.

DEIXAR UN COMENTARIO

Please enter your comment!
Please enter your name here