Lugo contará cun rocódromo que será unha “referencia” para a escalada en España

Agardase que as instalacións estean terminadas en agosto e listas para o inicio da tempada, en setembro. A obra está sufragada polo Concello, a Deputación e a Xunta.

Rocódromo / Sal&Roca

O secretario xeral para o Deporte, José Ramón Lete Lasa, e a directora xeral de Comercio e Consumo, Sol Vázquez, visitaron este luns o Pazo de Feiras e Congresos, onde este ano comezará a construción dun rocódromo que será unha “referencia en España” para as persoas que practican este deporte.

En declaracións aos medios de comunicación, foi o propio Lete Lasa quen cualificou esta obra, como “de referencia para a escalada en Galicia” e mesmo en España, porque só existen outras instalacións similares ás que se van a construír en Lugo na zona dos Pireneos.

Precisou que será unha dotación “compatible co recinto feiral”, en cuxa instalación se investirán 387.200 euros, financiados polo Concello de Lugo, a Deputación Provincial e a Xunta de Galicia.

“É unha actuación importante desde o punto de vista deportivo”, engadiu, porque permitirá darlle servizo “a unhas 5.000 licenzas federativas” e servirá para preparar a deportistas que poderían competir nas olimpíadas de 2020, dado que esta modalidade será entón olímpica.

Lembrou que estamos ante unha modalidade deportiva que aínda é “minoritaria”, pero tamén que está “en auxe”, de modo que a posibilidade de contar cunhas instalacións de “referencia en España” é “unha grandísima noticia para o deporte galego”.A obra será licitada en breve, co obxectivo de que estas instalacións estean terminadas en agosto e listas para o inicio da tempada, en setembro.

DEIXAR UN COMENTARIO

Please enter your comment!
Please enter your name here