O C.B. Breogán abriu a lista de espera con preto de 4600 abonados

Quique Fraga, director deportivo breoganista, afirmou que optaron pola "opción conservadora" e "infiltrar" a Henk Norel, mentres son "optimistas" con Lucio Redivo e creen que "é posible que comece a tempada"

Quique Fraga, Suso Lázare e Javier Morandeira, de esquerda a dereita. Foto de cbbreogan.com

Suso Lázare, presidente do Club Baloncesto Breogán, anunciou que o club superou os “4500 abonados” e chegou “preto dos 4600” de cara a vindeira tempada en Liga ACB, polo que quedou “pechada a campaña de abonados” e “abrindo a lista de espera”. Comentou que teñen “abonados novos de toda a provincia de Lugo”. Posteriormente, Javier Morandeira, xesto adxunto ao consello de administración, comentou que a lista de espera é “de medio centenar”, haberá “un palco a pé de pista” e o aforo será en torno aos 5400 espectadores.

Lázare anunciou como “patrocinadores principales” a “Cafés Candelas, Estrella Galicia, Abanca e Grupo Leche Río”. “Só hai un oficial, o que da nome ao equipo, o que estivo con nós nos intres máis difíciles”, recalcou sobre Cafés Candelas. Quixo “agradecer” ao “patrocinador principal, Cafés Candelas, polo apoio para poder configurar o resto de patrocinadores principais”.

O presidente quixo “agradecer tódolos servizos prestados, moito, moito tempo e moi ben levados” a José Miragaya, preparador físico do Breogán ata esta tempada, e, subliñou, que ten “parte do éxito” que tiveron “a campaña pasada”. Jaime Capellá, fisioterapeuta as dúas últimas tempadas, sustitúe a Miragaya como preparador físico xa que ten as dúas titulacións. Tamén chegará un fisioterapeuta con “tres anos de experiencia no baloncesto profesional” e tamén está a axudar nas últimas semanas Pablo Duarte, que lles está “gañando a todos”.

Pola súa banda, Quique Fraga, director deportivo do club, explicou que Henk Norel “tivo un golpe fortuito e resentiuse do xeonllo”. Afirmou que optaron pola opción “conservadora” e “infiltrar”. A outra sería “pasar polo quirófano” cunha baixa de “tres meses, un pouco menos quizais”.

En relación a Lucio Redivo, que sofre problemas nos aductores, comentou que “son optimistas”, aínda que deben ser “precavidos”, está respostando “francamente ben” e é “posible que comece a tempada”.

Sobre o mercado, foi claro: “Si hai a posibilidade de algo moi bo, sería cuestión de pensalo”.

 

 

 

 

DEIXAR UN COMENTARIO

Please enter your comment!
Please enter your name here