Javi López adianta a baixa de Cristian Herrera mañá por problemas estomacais

O adestrador albivermello afirmou que está "moi, moi ledo" con José Carlos Lazo, Dani Escriche e Giorgi Aburjania, que entraron na segunda metade na pasada xornada en Granada (1-1)

Javi López, no seu primeiro partido como primeiro adestrador do Club Deportivo Lugo. Foto de cdlugo.com

Javi López, adestrador de Club Deportivo Lugo, adiantou hoxe en rolda de prensa a baixa do dianteiro Cristian Herrera no partido de mañá contra o C.D. Numancia ás 16 horas no estadio Ángel Carro debido a “problema estomacal” que lle fixo pasar “a noite no hospital”.

O técnico barcelonés comentou que o equipo traballou esta semana “moi ben, na liña de ir mellorando día a día”, “con moita ilusión e moitas gañas”. Amosouse “moi, moi ledo” con José Carlos Lazo, Dani Escriche e Giorgi Aburjania, que entraron na segunda metade na pasada xornada en Granada (1-1).

Criticou a hora do partido (16 horas) pola previsible calor e contestou que en Galicia “hai sol”, polo que é “mal horario e mal negocio para os futbolistas e para os que queiran vir ao campo”.

Analizou que o Numancia é un equipo “aberto e atrevido, gústalle ter o balón” e cun esquema de “4-3-3”.

O Club Deportivo Lugo comunicou que tódolos xogadores están xa inscritos en La Liga. Javi López explicou que Guille Donoso tiña “o cartel de que ía ter saída”, pero “fóronselle pechando algunhas portas”. A axencia de representación de Donoso confirmou a súa continuidade no club. No caso de Ramón Azeez, “está nunha situación que se aclarará hoxe”, declarou López.

 

 

DEIXAR UN COMENTARIO

Please enter your comment!
Please enter your name here