Quique Fraga é o novo director deportivo do Club Baloncesto Breogán na Liga ACB

Quique Fraga, á esquerda, xunto a Suso Lázare, presidente do Breogán. Foto de cbbreogan.com

Quique Fraga é o novo director deportivo do Club Baloncesto Breogán, segundo confirmou Suso Lázare, presidente breoganista, en rolda de prensa. O Breogán xogará na Liga ACB a vindeira tempada trala confirmación da asemblea da Asociación de Clubes de Baloncesto (ACB). 

Quique Fraga foi segundo adestrador breoganista as dúas últimas tempadas con Natxo Lezkano. Foi o primeiro adestrador no último treito da tempada 2015-2016 e, previamente, segundo adestrador con Lisardo Gómez como primeiro técnico. Como segundo adestrador conseguiu o ascenso á Liga ACB este 2018 e chegou á final polo ascenso en 2015. Como primeiro técnico, acadou unha racha sobresaliente para meter a un equipo irregular nos playoffs, aínda que foi eliminado en cuartos de final.

“É unha oportunidade moi boa para mín, tanto para medrar profesionalmente como para axudar ao Breogán, que sempre foi o meu desexo e para iso traballei”, afirmou Quique Fraga en rolda de prensa. Comentou que xa axudou a “Natxo (Lezkano) e Juan Carlos (Castro) a confeccionar os equipos estes últimos anos” e que están “tentando que haxa un consenso na toma de decisións”.

Quique Fraga contestou que co base Ricardo Úriz, única renovación até o momento, van “ter un segundo base con experiencia que vai axudar moito en como levar ao equipo”. Subliñou a importancia do “rebote” e no “equilibrio” á hora de confeccionar o equipo.

Fraga confirmou que o escolta lucense Sergi Quintela ten contrato, reuniranse esta semana con Natxo Lezkano e van “tomar a decisión esta semana” sobre o futuro do xogador.

O novo director deportivo breoganista respondeu que “mínimo haberá tres adestradores” no equipo. Confirmou que el deixará de ser segundo adestrador e sobre Pablo Abuín, terceiro técnico a pasada tempada, “tamen se resolverá esta semana” o seu futuro.

Pola súa banda, Suso Lázare declarou que “Quique foi coa primeira persoa” coa que falaron para a dirección deportiva e, “despois dunha pequena rolda de catro-cinco entrevistas, o consello decidiu por unanimidade darlle a oportunidade a Quique” e “vai ter todo o apoio” do club.

Lázare tamén confirmou a Javier Morandeira como director xeral e están pendientes de nomear a un responsable de marketing.

O presidente do Breogán adiantou que o orzamento vai “superar os 2.5 (millóns de euros) e estar incluso preto dos 3”.

Lázare contestou que haberá “mínimo dous videomarcadores” no Pazo dos Deportes na vindeira tempada.

 

 

8 COMENTARIOS

  1. […] É a primeira fichaxe do Breogán para a vindeira tempada. Os bases Ricardo Úriz e Christian Díaz; os escoltas Salva Arco e Sergi Quintela; o aleiro Johan Löfberg; e os pívots Emir Sulejmanovic e Herve Kabasele, recuperándose dunha lesión, teñen contrato en vigor nun equipo no que continúa Natxo Lezkano como primeiro adestrador e Quique Fraga é o novo director deportivo. […]

DEIXAR UN COMENTARIO

Please enter your comment!
Please enter your name here