O Lugo reducirá aforo na grada supletoria por invadir o terreo municipal

Tino Saqués descarta construír unha nova bancada fixa esta tempada, unha obra para a que pide o apoio da Xunta, por ser este ente o titular do estadio. En canto aos cambios no vestiario, asumiu que Lazo e Valentín "non poderán retornar" ao club.

Tino Saqués. Foto de cdlugo.com

EFE.- O CD Lugo reducirá o aforo da bancada supletoria do Anxo Carro, de titularidade autonómica, por invadir terreo municipal. Ao tempo, aprazará a construción dunha bancada fixa nese fondo do estadio ata a seguinte campaña.

“A bancada invade un terreo municipal, aínda que o estadio é da Xunta. Hai que facer unha reestruturación da bancada ou unha nova bancada fixa”, explicou o presidente do Lugo, Tino Saqués, en rolda de prensa. O dirixente mantivo contacto coa Xunta e confía en que tales conversas cheguen a “bo porto” para poder edificar unha bancada fixa. Malia iso, xa asegurou que esa obra non se realizará este ano.  “Imos buscar unha solución provisional e esperamos que logo a Xunta sexa capaz de asumir a obra da bancada”, advertiu.

O presidente do Lugo sinalou que o convenio asinado no 2014 entre a anterior directiva e a Xunta establece que as “obras que veñan impostas por LaLiga ou a UEFA son por conta do club”, mentres que o equipo asume as de “mantemento”. Saqués entende que as “estruturais” non lle corresponden a eles. Neste sentido, puxo o exemplo de cidades como Vigo, Soria ou Huesca, nas que os “titulares dos estadios apoiaron as obras”. “Entendemos que a Xunta vai ir nesa liña amén do que diga o contrato. Para o club sería un investimento desmesurado, que non sería fácil de acometer e, ademais, en algo que non é noso”, considerou.

Á espera desa actuación maior, “provisionalmente” procederase ao “desmonte da bancada” supletoria actual para “deixala dentro dos lindes do estadio” e fóra da parcela do Concello. “O estudo está feito e estamos pendentes da licenza municipal para o cambio”, dixo Saqués, quen anunciou que a tempada empezará coa bancada xa reducida.

Respecto doutros traballos no Anxo Carro, Saqués anunciou unha “actuación menor no céspede para cumprir a normativa de LaLiga”. Tamén afrontará a mellora da “iluminación” con luces “led, sen cortes”, algo que agarda “pechar esta semana”.

CAMBIOS NO VESTIARIO

Por outra banda, o presidente do CD Lugo xa asumiu que os xogadores José Carlos Lazo e Gerard Valentín “non poderán retornar” ao club a vindeira tempada. Lazo e Valentín defenderon a elástica albivermella no curso 2018/1019 cedidos polo Getafe e polo Deportivo, respectivamente.

DEIXAR UN COMENTARIO

Please enter your comment!
Please enter your name here