O Breogán descende a LEB Ouro en Andorra (91-84)

Os lucenses perden a categoría despois dun partido que dominaron

Salva Arco e Emir Sulejmanović amosan a súa tristura despois do descenso. Foto de ACB

O Cafés Candelas Breogán descendeu a LEB Ouro despois de perder en Andorra (91-84) na penúltima xornada da Liga Endesa nun partido que dominou durante toda a primeira metade e parte do terceiro cuarto.

Os breoganistas foron superiores dende o comezo con triplas, circulación de balón e atopando tiros liberados cun ritmo alto. Os lucenses manexaron vantaxes de 8 e 9 puntos cun excelso Lucio Redivo, coa dirección de Aleksandar Cvetkovic´e co poderío interior de Volodymyr Gerun e Emir Sulejmanović.O Breogán amousou unha efectividade ofensiva importante cun traballo prácticamente coral. No comezo do terceiro cuarto, cunha dirección máis pausada de Christian Díaz, os lucenses colocáronse 13 puntos de vantaxe, con canastras tamén importantes de Salva Arco. Dende aí, o Breogán non controlou a diferenza ao seu favor co lanzamento exterior e a intensidade interior de Moussa Diagne. Andorra colocouse 5 arriba, os lucenses empataron, pero non foron quen de superar mentalmente esa adversidade e consumaron unha nova derrota, a quinta consecutiva, que supón o descenso a LEB Ouro.

Lucio Redivo foi o máximo anotador breoganista, con 18 puntos, seguido por Volodymyr Gerun, con 15, e Aleksandar Cvetkovic´, con 14.

DEIXAR UN COMENTARIO

Please enter your comment!
Please enter your name here