O cartel oficial do Arde Lucus 2019 xa ten gañador

'Legatvs', do lucense Juan Ramón Morales Núñez, será o cartel oficial do Arde Lucus 2019, recreación histórica que cumpre a maioría de idade

Detalle do cartel oficial do Arde Lucus 2019 | Concello de Lugo

Legatvs, de Juan Ramón Morales Núñez, presidirá o cartel anunciador do Arde Lucus 2019. O xurado profesional escolleu este deseño entre os dez finalistas seleccionados por votación popular. A imaxe oficial da festa declarada de Interese Turístico Nacional, a celebrar os días 14, 15 e 16 de xuño, foi desvelada este mércores pola concelleira de Cultura, Turismo, Xuventude e Promoción da Lingua, Carmen Basadre.

A imaxe que anunciará a gran recreación histórica, que cumpre a maioría de idade neste 2019, recibiu a máis alta valoración dun xurado conformado pola deseñadora gráfica Lucía Barrios, o fotógrafo Jesús Burgo, e o vicedirector da Escola Superior de Arte e Deseño Ramón Falcón, Alejandro Carro.

Obra do lucense Juan Ramón Morales Núñez, o cartel oficial do Arde Lucus tivo que superar en primeira instancia a votación popular na que participaron máis de dez mil persoas. Por vez primeira, o gañador recibirá un premio de 1.300 euros.

Basadre convidou tamén a asociacións de recreación histórica e á veciñanza a colaborar coa nova exposición que programa o Concello para conmemorar a décimo oitava edición do Arde Lucus. A participación consistirá en enviar un máximo de cinco fotografías ao enderezo electrónico lucusarde@gmail.com. Exporanse no Vello Cárcere en maio e xuño.

O Arde Lucus medra en espectáculo, mais non en recadación

DEIXAR UN COMENTARIO

Please enter your comment!
Please enter your name here