Xornal de Vigo | A Irmandade da Sanidade Galega (ISAGA), organización que pretende fomentar o uso do galego no ámbito sanitaro, denuncia o “proceso de eliminación do idioma galego” que está a realizar a Consellería de Sanidade no Hospital Álvaro Cunqueiro de Vigo. “Non estaría moi satisfeito Álvaro Cunqueiro se puidese observar o que está a suceder coa lingua galega no hospital  que leva o seu nome”, lamenta.

O ISAGA denuncia a desaparición do galego en varios ámbitos do hospital. Así, no aparcadoiro o idioma do sistema mecanizado é o castelán, tamén nos ascensores e mesmo os impresos para as citas e consultas que expiden as máquinas así como os resultados analíticos están escritos exclusivamente en castelán.

Ademais, o persoal que atende e informa aos usuarios nos mostradores utiliza sempre o castelán aínda que o usuario se dirixa a eles en galego. A estes feitos cómpre engadir que a historia clínica e a prescrición electrónica están programadas para usar de xeito preferente o castelán e non o galego. “Por suposto, as autoridades sanitarias tamén fan deixación da súa obriga con respecto ao idioma: o Conselleiro e os numerosos altos cargos do Sergas utilizan a cotío o castelán nas súas intervencións públicas”, sinala esta entidade.

Valedora do Pobo

De feito, esta situación xa chegou á Valedora do Pobo a través dunha queixa. Pero a súa resposta, lonxe de tranquilizar a esta entidade, revolucionouna. No canto de reclamar á Consellería de Sanidade o cumprimento da norma e o respecto da lei, o organismo de defensa dos dereitos dos cidadáns utiliza argumentos exculpatorios como que o aparcadoiro está xestionado por unha empresa privada, o software das máquinas é instalado polo fabricante no idioma que el elixe ou que as analíticas están feitas e informadas por unha empresa multinaciona.

“Resulta bochornoso e inxustificable que unha institución creada para a defensa do cidadán e dos seus dereitos actúe con esta complicidade coa Xerencia do hospital e a Consellería de Sanidade, que vulneran claramente a Lei de Normalización da Lingua”, denuncia o ISAGA.

O ISAGA lembra que a Lei de Normalización Lingüística recoñece  o galego como lingua oficial das institucións e da Administración, pero isto parece non importar neste e noutros hospitais. Din que todo o sistema sanitario galego está a padecer un progresivo descenso no uso do noso idioma na práctica asistencial. Por iso, reclaman da Xunta que impulse e potencie o idoma propio na súa rede sanitaria e que o Valedor rectifique e “actúe con firmeza”.