Robe Iniesta, Estopa, Morad, León Benavente, Ilegales e Delaossa encabezan o cartel do Caudal Fest, “a última gran festa” do verán galego que regresa a setembro na cidade de Lugo.
Unha edición que terá lugar o 16 e o 17 de setembro nos xardíns do Pazo de Feiras e Exposicións da Cidade das Murallas cun elenco de artistas heteroxéneos no que se combina a experiencia de nomes como o líder de Extremoduro con novos expoñentes do panorama musical como o barcelonés Morad.
A “última gran festa” do verán galego traerá de novo a Galicia a Robe Iniesta, embarcado no seu proxecto en solitario tras a errada xira de despedida de Extremoduro, primeiro posposta pola pandemia e despois cancelada definitivamente. Tamén visitarán Lugo os irmáns David e José Muñoz, con máis de dúas décadas ás costas paseando o nome de Cornellá de Llobregat polos escenarios de todo o Estado. O Caudal Fest será a única oportunidade para ver a Estopa este verán en Galicia.
Da experiencia de Robe e Estopa a Morad, o compositor e rapeiro catalán que popularizou o xénero ‘drill’ entre a mocidade con milleiros de escoitas en todas as plataformas dixitais. Estes son os tres grandes nomes que encabezan o Caudal Fest, cuxo primeiro avance da súa programación foi presentado este xoves nunha rolda de prensa que contou coa participación da alcaldesa luguesa, Lara Méndez, e o CEO da produtora Bring The Noise, Iván Méndez.
LEÓN BENAVENTE, ILEGALES E PROPOSTAS GALEGAS
Ademais, León Benavente presentará o seu cuarto álbum ‘ERA’ en Lugo, onde estarán outra das bandas máis lonxevas do rock español, Ilegales, embarcados na xira do seu 40 aniversario. O rapeiro malagueño Delaossa, un dos artistas con máis proxección do hip hop actual, e o grupo de electropop Cupido –liderado polo trapeiro Pimp Flaco– son outras das bandas que achegan o toque urbano ao festival.
Ciudad Jara, Cariño, Mujeres, Ciclonautas, Paranoid 1966, Judeline, Fresquito e Mango ou Los Flamingos, completan o avance de bandas estatais da cita luguesa, que ten a Terbutalina, Grande Amore ou os carballeses Apart como representantes da música galega. As entradas estarán á venda a partir do próximo mércores 11 de maio ás 12,00 horas do mediodía a partir dun prezo de 39 euros máis gastos.
