Un concurso de decoración do Arde Lucus para manter vivo o espírito da festa

Xanelas, balcóns e fachadas poderán adornarse en base á temática desta celebración castrexo-romana, que este ano fica suspendida por mor do coronavirus. Haberá premios económicos.

Un sábado no Arde Lucus 2018 | Óscar Bernárdez

A pandemia do coronavirus obrigou a suspender a edición do Arde Lucus 2020, pero iso non significa que a cidade teña que quedar allea ao espírito desta festa. Por iso, o Concello de Lugo convocou un concurso de decoración de balcóns, xanelas e fachadas coa temática do Arde Lucus. Contémplanse tres premios económicos para a categoría de vivendas e outro para as comunidades de veciños.

O alcance deste certame, explicou o goberno local, será toda a cidade de Lugo e o tema a desenvolver virará única e exclusivamente ao redor do ambiente do Arde Lucus. As decoracións deberán estar visibles desde a vía pública entre o 18 e o 28 de xuño, ambos incluídos. Non poderán participar aqueles balcóns, xanelas ou fachadas de edificios públicos ou oficiais, nin tampouco os dos establecementos comerciais ou hostaleiros.

O concurso establece tres premios para vivendas: un primeiro galardón dotado con 1.000 euros; un segundo premio, con 500; e un terceiro, para o que irán 300 euros. En canto ás comunidades de veciños, haberá un único premio de 600 euros.

PRAZO E REQUISITOS

O prazo para solicitar a participación neste certame será ata o 12 de xuño, a través dun correo á dirección electrónica xuventude@lugo.gal. No asunto de dita mensaxe deberase indicar o nome do concurso e, no corpo do texto,o  nome, apelidos e DNI da persoa participante, xunto á dirección do balcón/xanela/fachada a decorar e un teléfono de contacto. A inscrición é gratuíta.