O delegado territorial da Xunta de Galicia, José Manuel Balseiro, asegura que non se debe descartar” o proxecto para converter o Cuartel de San Fernando, en pleno centro do centro histórico de Lugo, nun centro de interpretación da romanización, pero sen “obsesionarse” coa proposta.
Balseiro lembrou que o Cuartel de San Fernando é un edificio de propiedade municipal, cuxo mantemento lle corresponde ao Concello de Lugo, onde o BNG goberna en coalición co Partido Socialista.
En resposta ás declaracións da portavoz nacional do BNG, Ana Pontón, quen onte responsabilizaba á Xunta da situación de abandono que, ao seu xuízo, presenta este edificio -catalogado como Ben de Interese Cultural- o delegado territorial lembrou que a pesar de que o edificio é de titularidade municipal, a Consellería de Cultura veu colaborando co Concello de Lugo para garantir a súa conservación.
“En xaneiro de 2016 asinamos un convenio”, afirmou, mediante o cal a Xunta de Galicia achegou 90.000 euros, “a mesma cantidade que o propio Concello, para a execución de obras de mantemento no cuartel”.
En canto ao proxecto para converter o cuartel no futuro Centro da Romanización, unha proposta que o BNG pretende retomar mediante unha iniciativa parlamentaria, Balseiro lembrou que “estivo aparcado por diferentes gobernos municipais e autonómicos, nos que tamén participou” o partido nacionalista.