A asociación cultural Tele-Clube quere despedir o tempo de verán dunha maneira especial, cunha festa que vai máis aló do musical. Dous concertos con vistas ao río Miño, na terraza da UNED, conforman a proposta que lanza este colectivo para o serán do vindeiro venres 30 de agosto. Os grupos Allova e Atención Tsunami serán os encargados de animar a tardiña. A celebración de fin de tempada estenderase pola noite no local Ho! Gruf, en Campo Castelo.
Dende Tele-Clube, suxiren aos lucenses desprazarse ata a zona da “nosa marabillosa Tolda”, para aproveitar o espazo do que dispón a Universidade Nacional de Educación a Distancia (UNED) na cidade de Lugo. Baixo o solpor, poderase gozar de música electrónica por riba das augas do Miño. As portas abriranse ás oito da tarde, momento a partir do cal se ofrecerá unha pequena degustación con “delicias culinarias” que preparará o restaurante lucense ‘Paprica‘.
MÚSICA ELECTRÓNICA
Os concertos virán da man de Allova e Atención Tsunami, dúas bandas diferentes que proveñen da Coruña e de Madrid, respectivamente. O primeiro deses proxectos musicais afonda no triphop e no indie electrónico da man de Alla Mikhayvola, cantante, pianista e compositora de orixe rusa. Logo de prodigarse no 17º Ribeira Sacra e na Osa de Mar e uns días antes de actuar no Festival de La Luz, Allova actuará coa súa banda na terraza da UNED para a veciñanza lucense. Ofrecerán cancións nas que mesturan o piano con outros instrumentos acústicos e cun directo no que cabe a improvisación a partir de loops. Ademais, adiantarán cancións do seu primeiro disco, que está a piques de ver a luz.
A iso das 21.30 horas será a quenda de Atención Tsunami, que “golpearán os nosos sentidos” e farán “rebentar a improvisada pista de baile”. Esta banda madrileña foi construíndo o seu propio camiño á marxe da industria (autoeditáronse en ‘Récords del Mundo’). Non lles foi tan mal, din dende Tele-Clube, xa que o seu anterior traballo, ‘Silencio en la retaguardia’ foi considerado o mellor disco do ano para El Mundo e o mellor de Madrid para Mundosonoro.
A FESTA SEGUE NO CENTRO
A festa non rematará nesta zona da cidade, senón que continuará no centro histórico da cidade. En concreto, no local Ho! Gruf (Praza de Campo Castelo, 52). O DJ Tristón (proxecto en solitario de Ismael de The Fakes) fará soar ritmos que evocan sons africanos ou rockeiros con tintes electrónicos, pero que tamén van dende a cumbia ata a ayahuasqueira.
Tele-Clube anuncia así esta proposta tan festiva e orixinal para deixar atrás os meses estivais e dicir, entre bailes, ‘Ola, setembro!’. As entradas poderanse mercar por anticipado nesta web, cun custe de 10 euros, ou ben agardar a facerse con elas na billeteira por 13 euros.
