Cinema social ao aire libre: unha forma de tecer redes entre a veciñanza de Lugo

A Plataforma 'Lugo Sen Mordazas' bota a andar a segunda edición desta actividade, que se inicia o xoves 11 coa proxección do filme árabe 'A bicicleta verde'

Fotograma da película 'A bicicleta verde', o filme que dará comezo a este II Ciclo de Cinema de Verán 'Sen Mordazas' en Lugo | RTVE

Gozar do cine ao aire libre non é unha fantasía que só se vive dentro das propias películas. É posible facelo na realidade e, aínda máis!, é posible facelo en Lugo. O II Ciclo de Cinema de Verán ‘Sen Mordazas’ chega á cidade durante xullo e agosto para proxectar filmes de temática social na praciña da Canella do Hospital.

A Plataforma ‘Lugo Sen Mordazas’  (LSM) é a organizadora desta actividade por segundo ano consecutivo. Iniciarase o xoves 11 coa proxección da cinta árabe ‘A Bicicleta Verde’, obra da primeira directora de cine árabe: Haifaa Al-Mansour. A historia relata as andanzas de Wadjda, unha nena “que ten que enfrontarse á patriarcal e ríxida sociedade saudí para poder cumprir o seu soño de montar en bicicleta”.

O colectivo impulsor desta iniciativa naceu hai pouco máis dun ano, en maio do 2018. Xurdiu como resposta ao intento de impoñer en Lugo unha “Ordenanza Cívica”, tumbada grazas á teima de LSM. Con todo, ademais da loita contra a represión, entenden que outro “obxectivo esencial deste movemento é o de tecer comunidade entre as veciñas de Lugo” e procurar “espazos de encontro en torno a unha actividade social e cultural”.

Deste desexo de crear comunidade, xorde a idea de recuperar as actividades na rúa e de priorizar “este modelo fronte ao consumismo que se materializa a través da hostalaría”. Neste sentido, coidan que o casco vello de Lugo –igual ca en Santiago, por exemplo– está a transformarse, vítima da “turistificación“. No canto desa “expansión de terrazas”, dende a Plataforma propoñen “cidades pensadas para as veciñas”.

Así, emprenderon o II Ciclo de Cinema Sen Mordazas, que se celebrará todos os xoves de xullo e agosto (agás previo aviso) ás 22:00 horas. É un encontro para compartir cultura e reflexión social entre veciños, na praza da Canella do Hospital (rúa que une Santo Domingo co carril do Son que dá á Praza de Abastos)

DEIXAR UN COMENTARIO

Please enter your comment!
Please enter your name here