A Xunta asegura o abastecemento de auga no núcleo de Ouviaña

O núcleo, ao pé da Pena de Ouviaña e a 4 quilómetros de Chao do Pousadoiro, contará cun novo sistema de subministro de auga para domicilios e explotacións

Vista do núcleo de Ouviaña, en Ribeira de Piquín | Google
Vista do núcleo de Ouviaña, en Ribeira de Piquín | Google

O Concello de Ribeira de Piquín recibirá unha achega da Xunta de Galicia de 41.000 euros para asegurar o subministro de auga do núcleo de Ouviaña. O proxecto contempla a instalación dun novo sistema de abastecemento e prevé a construcción dun depósito de 70 metros cúbicos.

A nova infraestrutura de almacenamento e condución substituirá á vetusta rede de traídas individuais, conectadas na actualidade a un depósito común que non cobre as necesidades do lugar. En Ouviaña hai 15 vivendas e 4 explotacións gandeiras.

Así, levarase unha acometida a cada un dos domicilios, ao tempo que serán dispostas dúas arquetas para a captación de auga –a existente atópase en mal estado–, e tres bocas de rego.

A totalidade do orzamento da intervención en Ouviaña sae do goberno galego, a través da Vicepresidencia e Consellería de Presidencia, Administracións Públicas e Xustiza. Ribeira de Piquín, eminentemente rural e cunha poboación moi dispersa, ten a cerna da súa economía no agro e na gandería.

DEIXAR UN COMENTARIO

Please enter your comment!
Please enter your name here