A Xunta premia o plan de formación do profesorado do Fontem Albei

O instituto plurilingüe da Fonsagrada é recoñecido novamente polo desenvolvemento das competencias profesionais do profesorado

O IES Plurilingüe Fontem Albei da Fonsagrada foi premiado polo seu proxecto de formación do profesorado | Xunta de Galicia
O IES Plurilingüe Fontem Albei da Fonsagrada foi premiado polo seu proxecto de formación do profesorado | Xunta de Galicia

O IES Plurilingüe Fontem Albei da Fonsagrada foi recoñecido pola Xunta de Galicia pola calidade do seu plan de formación do profesorado. Este centro situado en plena montaña, a mil metros de altitude, é un dos oito premiados pola Consellería de Educación neste 2018, sendo o único que repite con respecto ao ano anterior.

Os Premios a Proxectos de Formación Permanente do Profesorado valoran os plans deseñados polos propios colexios e institutos durante o curso precedente. Por provincias, a Consellería de Educación, Universidade e Formación Profesional premiou a tres centros da Coruña, tres de Pontevedra, un de Ourense, e o devandito Fontem Albei.

Así, os outros galardoados son o CEIP Plurilingüe de Palmeira, de Ribeira; o CEIP Plurilingüe San Marcos, de Abegondo; o CEIP Plurilingüe Os Casais, de Fene; o CEIP de Portonovo, de Sanxenxo; o CEIP Nosa Señora das Dores, de Forcarei; o IES Valadares, de Vigo; e o CEE O Pino, de Ourense.

Implicados 7 de cada 10 centros

Segundo manifesta a Xunta de Galicia, para a concesión dos premios valorouse o contido innovador e transferibilidade do proxecto, os recursos tecnolóxicos utilizados, o traballo multidisciplinar e en equipo, o grao de implicación da comunidade educativa, os recursos achegados á comunidade e o desenvolvemento das competencias profesionais docentes a través destes proxectos.

Así mesmo, tívose en conta a existencia dun sistema de avaliacións relativo á implantación e desenvolvemento do proxecto e o nivel de logro acadado. Todos e cada un deles están deseñados co apoio dun Centro de Formación e Recursos (CFR) ou do Centro Autonómico de Formación e Innovación (CAFI) e son desenvolvidos baixo a súa supervisión.

Os proxectos están baseados na análise e detección das necesidades educativas do centro e propoñen estratexias de carácter didáctico e metodolóxico por medio do traballo colaborativo e adaptado a cada contexto. A súa finalidade é mellorar o ámbito organizativo ou a xestión dos centros, afectarlle cualitativamente á contorna familiar e institucional ou contribuír á elaboración e uso de recursos multimedia interactivos.

No curso 2017/18, sete de cada dez centros de ensino públicos (un total de 688 centros) desenvolveron un Plan de Formación Permanente do Profesorado (PFPP) con unha ou máis liñas formativas, plans que teñen como obxectivo perfeccionar as competencias profesionais dos docentes.

DEIXAR UN COMENTARIO

Please enter your comment!
Please enter your name here