As mulleres da Montaña denuncian ter que viaxar 80 km para realizar controis xinecolóxicos

"As administracións deberían facilitar a vida das persoas que aínda vivimos no rural, e os nosos concellos, Negueira e A Fonsagrada, que non posúen as mellores vías de comunicación, carecen de moitos servizos", aseguran no escrito que pretenden mandar á Consellería xunto cunha recollida de firmas.

Imaxe dun centro de saúde / GC
Imaxe dun centro de saúde / GC

A veciñanza da Fonsagrada e de Negueira de Muñiz vén de iniciar unha recollida de firmas coa intención de presentar perante a Consellería de Sanidade. Pretenden, a través dela, visibilizar os atrancos que sofren polo feito de vivir nas aldeas da Montaña: estas mulleres vense obrigadas a viaxar ata Becerreá ou Lugo para, por exemplo, recibir tratamentos de rehabilitación ou controis de enfermaría xinecolóxica.

“O desprazamento que temos que facer para recibir estes tratamentos supón en moitos casos máis de 80 quilómetros de ida e outros tantos de volta, o que leva consigo que a doenza que imos tratar se vexa agravada por este feito”, sinalan no escrito que han remitir á Xunta de Galicia.

Solicitan, daquela, que se facilite a atención sanitaria preto dos lugares onde viven: “Somos coñecedores de que noutros municipios reciben estes tratamentos no seu centro de saúde, que a distancia que teñen que recorrer é moito menor ca a nosa, e que ademais, poden facelo por autoestrada”, remarca a veciñanza.

Por iso, instan a parar o desmantelamento dos servizos sanitarios nas zonas rurais. “As administracións deberían facilitar a vida das persoas que aínda vivimos no rural, e os nosos concellos, Negueira e A Fonsagrada, que non posúen as mellores vías de comunicación, carecen de moitos servizos”. Xa que logo, demandan da xerencia do Sergas en Lugo e da Consellería de Sanidade a posibilidade de que se acheguen xeograficamente estes tratamentos rehabilitadores e os controis xinecolóxicos das mulleres.

DEIXAR UN COMENTARIO

Please enter your comment!
Please enter your name here