O PP da Fonsagrada ofrécese ao BNG para botar da Alcaldía o PSOE

Os nacionalistas ratifícanse en non negociar coa dereita.

Argelio Fernández Queipo, alcalde da Fonsagrada | Óscar Bernárdez
Argelio Fernández Queipo | Óscar Bernárdez

O PP da Fonsagrada (Lugo) ofreceu ao BNG alcanzar un acordo para desbancar ao PSOE do bastón de mando nesta localidade, cuxo alcalde, Argelio Fernández Queipo, ocupou unha vicepresidencia na Deputación de Lugo liderada por Darío Campos no mandato que agora termina.

“Non queremos que se goberne desde un despacho en Lugo”, manifestoumo candidato popular, José Luís Regueiro, quen explicou que lle enviaron un documento ao BNG con varias propostas posibles para desaloxar o PSOE, con cinco edís, igual que o PP.

Pero os nacionalistas rexeitan negociar co PP. A portavoz nacional do Bloque, Ana Pontón, reiterou esta postura da formación frontista aplicable a toda a xeografía galega e como directriz xeral para todas as localidades, por mor de que xa xurdise esta posibilidade en Catoira (Pontevedra)

Fontes nacionalistas explicaron que o BNG “non entra en especulacións” co PP, a quen lle piden explicacións sobre “que busca con este tipo de manobras” cando, ademais, o presidente do seu partido, Alberto Núñez Feijóo, defende sempre que goberne a lista máis votada –no caso da Fonsagrada si foi o PP, pero non así en Catoira–.

Con todo, o candidato do PP á Alcaldía da Fonsagrada defende a posibilidade de que entre ambos os partidos se facilite un “cambio” de goberno neste municipio, xa sexa coa abstención do BNG para facilitar o goberno do PP ou un bipartito.

“Entendemos que como grupo máis votado deberiamos liderar o cambio, a xente demandou un cambio. Pero preferimos un do BNG, que o PSOE, que foi un desastre para A Fonsagrada”, sentenciou.