A mocidade do Bierzo “axita” o futuro dunha comarca da que non quere marchar

O apego á terra de varios estudantes que residían en Madrid plantou a semente da actual asociación El Filandón Berciano. Buscan crear oportunidades para non ter que migrar, tecer comunidade entre eles e non esquecer a tradición.

Varios membros da asociación El Filandón Berciano | LX

Do outro lado de Pedrafita, Dennis Álvarez responde a chamada do teléfono. “Si, son eu. Xa me comentaron os meus compañeiros do Filandón que iades chamar. Dixéronme que falara eu”, ri. Hai, no Bierzo, unha pequena revolución da mocidade: rapazas e rapaces que decidiron xuntarse para “mover” e “axitar” unha comarca na que queren quedar a vivir a pesar de todas as dificultades.

El Filandón Berciano é unha asociación que agrupa a xuventude do Bierzo en torno á idea de non deixar esmorecer a súa terra. A ollos da administración, o Filandón conformouse hai moi pouquiño tempo, pero a semente xa abrollara hai un ano cando varios bercianos que estudaban en Madrid se lanzaron a abrir un blog para escribir sobre o Bierzo dende a mirada da xente moza.

“QUE VAS FACER AQUÍ CO TÍTULO UNIVERSITARIO?”

“Somos a  mocedá berciana. Queremos vivir no noso fogar. Non queremos migrar e temos moitas ganas de aprender”. Preséntanse así nas redes sociais, onde celebran sempre o espírito de comunidade que foron creando arredor da asociación. Coma nun fiandón de toda a vida: reunión, alegría, tradición.

“Miña avoa dime: ‘pero que vas facer no pueblo co título universitario?’“, conta Dennis. “Hai esa tendencia a marchar fóra, pero temos que cambiar a perspectiva. Igual se quedamos aquí non temos o traballo soñado, pero temos outros tres ou catro traballos posibles”. A ausencia dun futuro laboral acorde aos estudos de cadaquén é unha das carencias que máis perciben ao seu redor. “Pero onde non hai algo, en vez de queixarse, podes facelo ti”, apunta.

MOVER O MUNDO

E, con esas, buscan armar unha oferta cultural diversa e completa, tecer unha rede de contactos profesionais, “aproveitar o que hai e potencialo”, axudárense uns aos outros, “animar a xente nova a organizarse, mover e axitar o mundo rural do Bierzo”.  Buscan facer da súa comarca un sitio atractivo de cara a asentar poboación.

Castro Ventosa en Valtuille de Arriba (O Bierzo) | Lucía Suárez – El Filandón Berciano

De momento xa promoveron un concerto en Valtuille, “un sitio pequeno no que nunca adoita haber nada”, e tratan de recuperar o Entroido tradicional do Bierzo. Ademais, este grupo de xente moza segue activa no seu blog e redes sociais, á parte de compartir coñecemento e oralidade a través das ondas de Radio Bierzo-Cadena Ser. Conversan, entre outras, sobre tradición e lingüística.

O GALEGO NO BIERZO

Dennis afonda un chisco nisto: “A xente maior do Bierzo occidental si que fala galego, pero a mocidade non o ten tan presente. Está bastante invisibilizado e, en xeral,  non hai unha conciencia lingüística. Case que é visto como algo raro que só falan os maiores, pero en realidade son palabras que nos conectan co que se fala en Galicia e mesmo en Portugal”.

Polo momento, El Filandón Berciano reúne un centenar de socios e case un milleiro de seguidores tanto no Instagram como no Facebook. Dende esas pequenas ventás ao mundo, expanden unha ollada moza sobre a súa terra que axiña se ha materializar en actividades e (outras) realidades.

DEIXAR UN COMENTARIO

Please enter your comment!
Please enter your name here