InicioCulturaA veciñanza do Bierzo busca organizarse para retomar a reivindicación provincialista

A veciñanza do Bierzo busca organizarse para retomar a reivindicación provincialista

O vindeiro 28 de marzo celebrarán unha reunión para crear un grupo que lle dea pulo a unha hipotética recuperación da provincia do Bierzo, xusto un ano antes de que se cumpra o 200º cabodano da súa creación. A xuntanza xorde tamén como resposta á petición de segregación de León.

PUBLICADA O

- Advertisement -

O concello de Carracedelo, na comarca do Bierzo, acollerá o vindeiro 28 de marzo unha xunta para a creación dun grupo reivindicativo da provincia berciana e en defensa da lingua galega en dito territorio.

A convocatoria, pensada para reavivar o debate histórico do provincialismo, xorde como resposta á reclamación de autonomía para León. Aínda que de momento non manexan previsións de asistencia, explican que a idea é que á reunión acudan persoas do Bierzo, pero tamén galegas. 

Quen confirmou a súa asistencia é o colectivo cultural Fala Ceibe, cuxo voceiro é Xabier Lago. De feito, xa fixeron públicas as propostas que levarán á mesa de debate e que se artellan en torno a tres eixos: primeiro, a xa citada reclamación provincialista; segundo, a necesidade de estreitar os vencellos entre Galicia e O Bierzo; e, en terceiro lugar, a reivindicación da cooficialidade da lingua galega.

O vindeiro 2021 celébrase o 200º aniversario da creación da provincia liberal do Bierzo, segundo lembra Xabier Lago Mestre. Parécelle unha boa ocasión para “recuperar” a provincia ou, cando menos, para “fortalecer o debate histórico entre a cidadanía” e para “presionar as administracións públicas para que non esquezan este acontecemento tan salientable”.

A COOFICIALIDADE, ASUNTO DE FONDO

Respecto da defensa da lingua galega, Lago Mestre destaca un dato positivo: o aumento da demanda do galego no ensino regrado. Tal como asegurou nun acto en Vilafranca o secretario de Política Lingüística da Xunta, Valentín García, “medrou en 34 o número de alumnas que se incorporaron ao Programa de promoción do galego no Bierzo e Seabra para estudar o galego”.

Así pois, o asunto da cooficialidade lingüística tamén será abordado na xunta prevista para o sábado 28 de marzo. “Haberá que decidir cal é a proposta para o seu procedemento. Nós suxerimos que sexa levada ao Parlamento en busca do apoio de grupos políticos“, como xa adiantaran hai uns meses dende Fala Ceibe.

Sen marcaren expectativas, agardan que o encontro sirva para potenciar a representación pública das bercianas e bercianos, tanto na Comunidade de Castela e León coma en Galicia.

ÚLTIMAS

Obradoiros de coiro, cerámica e teares para celebrar os ‘Días Europeos da Artesanía’

A Vicepresidencia da Deputación de Lugo, a través da área de Artesanía, súmase á...

Coñecemos á ‘Galiartesá’, Pepa Lombao, oleira de Bonxe

O Galicia Confidencial presenta a serie 'Galiartesáns e galiartesas' coa que procura visibilizar diferentes oficios artesáns...

O Concello de Lugo defende que os recursos empregados no Ceao foron “suficientes”

A concelleira de Cohesión Social de Lugo, Ana González Abelleira, saíu ao paso das...

Bombeiros dá por extinguido o incendio no polígono de O Ceao e a Policía Científica inicia a súa investigación

Bombeiros de Lugo deu por extinguido este mércores o incendio que calcinou na xornada...