A Xunta renovará a conexión da N-VI co polígono de Becerreá

O executivo autonómico realiza a segunda intervención en dous anos nos accesos á área industrial do concello da Montaña

(Arquivo) Visita do delegado territorial da Xunta, José Manuel Balseiro, ao polígono industrial de Becerreá | Xunta de Galicia
(Arquivo) Visita do delegado territorial da Xunta, José Manuel Balseiro, ao polígono industrial de Becerreá | Xunta de Galicia

O goberno autonómico realizará nos vindeiros meses unha nova mellora nos accesos ao polígono industrial de Becerreá. Se no exercicio pasado levouse a cabo un investimento na conexión co núcleo urbano, na rúa Corteliña, desta vez trátase de rehabilitar o treito que vencella esta área empresarial coa estrada N-VI.

En total suporá unha partida de 191.700 euros, montante do que 120.000 euros corresponden á primeira fase, e 71.700 á segunda. A Consellería de Economía, Emprego e Industria asumiu en ámbolos casos o 80 por cento do custo das intervencións neste municipio dos Ancares.

O delegado territorial de Lugo, José Manuel Balseiro, subliñou que a Xunta aposta pola modernización das infraestruturas dos parques para “facer máis competitivas ás nosas empresas, que poden deste xeito beneficiarse da mellora dos servizos comúns das áreas industriais”.

A obra que se levará a cabo en Becerreá servirá para mellorar a seguridade viaria na zona. Segundo está previsto, construirase unha beirarrúa pola marxe dereita que conecte o parque empresarial coa saída cara á N-VI, repararanse outros treitos de beirarrúas e do firme da calzada, e completarase a instalación de servizos de abastecemento e recollida de pluviais afectados.

O representante da Xunta en Lugo lembrou que no conxunto da provincia a Consellería apoia con 1,3 millóns de euros proxectos de actuación nos parques empresariais de 15 concellos, mobilizando entre este aporte e o realizado por outras administracións ata 1,6 millóns de euros de investimento.

Estas axudas, afirmou Balseiro, “poñen de manifesto que a Xunta segue mantendo o seu compromiso cos gobernos locais e o desenvolvemento das súas infraestruturas, co fortalecemento do tecido empresarial e industrial e co apoio ao emprendemento”. O obxectivo do executivo galego é encaixar estas liñas de acción coas medidas auspiciadas pola Lei de Implantación Empresarial, coñecida entre a oposición como a Lei de Depredación.

1 COMENTARIO

  1. […] No conxunto da provincia de Lugo, o goberno galego investirá este ano 1,3 millóns de euros para intervir en 15 concellos. Esta liña de apoios está a permitir a modernización dos parques empresariais como dinamizadores da economía e do emprego local, na procura da súa mellora competitiva. Recentemente avanzouse unha partida para mellorar as conexións do polígono de Becerreá. […]

DEIXAR UN COMENTARIO

Please enter your comment!
Please enter your name here