InicioSociedadeA voltas co topónimo dos Ancares: Candín quéreo para si, pero en...

A voltas co topónimo dos Ancares: Candín quéreo para si, pero en Lugo defenden unha identidade común

O concello berciano iniciou o procedemento para adoptar o novo nome. Un grupo de mozas de Navia retrucan a proposta e avogan por entender que "Os Ancares está en todos os municipios onde forma parte da identidade dos veciños".

PUBLICADA O

- Advertisement -

Boletín Oficial da Provincia de León recollía o pasado 30 de decembro o inicio do procedemento polo cal o concello berciano de Candín pretende mudar o seu nome e pasar a chamarse Ancares. Así o decidiu a corporación municipal nun acordo plenario para trasladar unha suposta reivindicación social que considera o termo dos Ancares como exclusivo daquela zona. Do outro lado da fronteira autonómica, na Montaña luguesa, a noticia produce certo malestar e avógase por defender un futuro e unha identidade comúns tanto para Os Ancares leoneses como para os lucenses.

En Candín entenden que o topónimo Ancares fai referencia unicamente a este municipio e non á serra compartida entre O Bierzo e Lugo. Apóianse en que o río Ancares nace en territorio de seu. O debate xa está aberto dende hai cousa de 30 anos, cando se puxo en marcha unha iniciativa social ao respecto, pero non foi ata agora que isto se fixo oficial.

Un grupo de rapazas de Navia de Suarna que recibiron con mágoa esta nova quixeron unirse para amosar outra perspectiva da polémica. Nun texto redactado pola antropóloga Rita Blanco Prada, lembran que o Porto de Ancares se atopa no municipio naviego, tal como ratificou o Instituto Xeográfico Nacional. Ao tempo, botan man de documentos históricos que acreditan o uso do topónimo dos Ancares para referirse tanto ao porto como a toda o conxunto das montañas.

CARACTERÍSTICAS COMPARTIDAS

“Sen entrar nas consecuencias que isto podería traer para o resto de municipios dos Ancares, o importante é que non se trata de enfrontarse para ver quen ten máis dereito a identificarse como tal”, din. “Ancares son as aldeas que teñen algunhas casas no Bierzo e outras en Galicia; Ancares son os nenos de aldeas de Candín que foron á escola en Cervantes ou en Navia de Suarna; Ancares é a xuventude que está agora loitando por una alternativa nesta zona, traballando en ambas vertentes da serra”.

Propoñen fuxir de conflitos fronteirizos e prestar atención a que se trata dunha “zona cunhas características socioculturais comúns e que comparte os mesmos problemas“. Pouco importa que Os Ancares estea dividido en dous a nivel administrativo, proseguen, porque “a nivel humano sempre foi un só”.

“Aínda que o porto estea en Navia de Suarna e o río naza en Candín, Ancares está en tódolos municipios onde forma parte da identidade dos seus veciños e veciñas“, remata o texto. Daquela, apostan pola colaboración para loitar por unha zona que é “periférica nas dúas comunidades” e facilitarlle un futuro digno e común.

PERÍODO DE ALEGACIÓNS

Coa publicación no BOP de León do inicio do procedemento administrativo para cambiar o topónimo de Candín, ábrese un prazo de 30 días para que calquera que se considere afectado poida presentar as correspondentes alegacións.

ÚLTIMAS

Coñecemos á ‘Galiartesá’, Pepa Lombao, oleira de Bonxe

O Galicia Confidencial presenta a serie 'Galiartesáns e galiartesas' coa que procura visibilizar diferentes oficios artesáns...

O Concello de Lugo defende que os recursos empregados no Ceao foron “suficientes”

A concelleira de Cohesión Social de Lugo, Ana González Abelleira, saíu ao paso das...

Bombeiros dá por extinguido o incendio no polígono de O Ceao e a Policía Científica inicia a súa investigación

Bombeiros de Lugo deu por extinguido este mércores o incendio que calcinou na xornada...

Rexeitamento da Deputación de Lugo á instalación da planta Altri en Palas

A Deputación de Lugo manifestou a súa oposición á planta de Altri no municipio...