O vento zoa con forza en toda a provincia de Lugo e chega a alcanzar os valores máis elevados da autonomía. Viveiro rexistrou refachos de 183 quilómetros por hora, e as estacións meteorolóxicas mediron ventos de 155 quilómetros por hora na montaña dos Ancares, en Cervantes, ou por encima dos 130 na Pontenova e Burela.
En Lugo o 112 rexistrou 325 incidencias, e en toda Galicia, xa son un total de 60.000 os fogares galegos que se atopan sen subministración eléctrica a causa do temporal. As zonas máis afectadas son a montaña de Lugo e Ourense, esta última é a provincia que máis sufriu os efectos do temporal que se instaurou este fin de semana en Galicia. Ás 11,00 horas deste domingo, 25.000 fogares permanecen sen electricidade en Ourense, 15.000 na Coruña, 10.000 en Lugo e 10.000 en Pontevedra.
A maior parte destes cortes teñen a súa orixe na caída de árbores, ramas ou cortizas das árbores sobre as liñas do tendido eléctrico a causa do forte vento, que superou os 160 quilómetros por hora en distintos puntos. O temporal, que mantén a súa virulencia, así como as dificultades de acceso ás liñas eléctricas afectadas, están a complicar o traballo das brigadas.
No entanto, seguen aparecendo incidencias de pouca importancia nalgunhas estradas secundarias pola caída de árbores e outros obxectos sobre o firme. A máis “importante agora mesmo” produciuse no municipio lugués de Baralla, no tramo de estrada que une a saída 469 da A-6 coa N-V. Alí caeu unha árbore que obrigou a cortar o tráfico ata que se consiga retirar o obstáculo e recuperar a seguridade da zona para restaurar a circulación.
RECOMENDACIÓNS
Ante esta situación, que se manterá ata a noite deste sábado, os servizos de emerxencia recomendan evitar calquera tipo de actividade no exterior durante o día polo risco de caída de árbores, obxectos ou mobiliario urbano. Tamén é recomendable prestar atención ás alarmas por risco de inundación e lembrar o número de atención ás emerxencias, o 112.
