Os servizos de emerxencia traballaron na tarde deste sábado na extinción dun incendio que calcinou por completo unha vivenda e parte doutra no concello lucense de Palas de Rei.
O 112 Galicia recibiu o aviso a través da Garda Civil, sobre as 13,30 horas. Os axentes sinalaban que foran alertados por un particular deste lume rexistrado na parroquia de Augas Santas e que, en principio, non había persoas afectadas.
Así, nada máis coñecer a situación, os xestores do 112 informaron aos Bombeiros de Chantada, ao GES de Monterroso e a Protección Civil de Palas de Rei.
Ao final das tarefas de extinción, os membros do GES de Monterroso confirmaron á central de emerxencias que as vivendas afectadas polo lume estaban deshabitadas e que unha delas quedara completamente calcinada.