A Rede Museística Provincial e o Colectivo Agrocuir da Ulloa colaboran na posta en marcha do proxecto “Facémonos escoitar?” que ten como obxectivo recoller testemuñas orais para “construír a memoria LGTBIQA+” en distintas comarcas.
Con este proxecto crearase un mapa interactivo no que aparecerán audios xeolocalizados relacionados coa diversidade sexual e de xénero que fosen enviados pola cidadanía. “Non buscamos unicamente persoas LGTBIQA+, senón calquera persoa que considere que ten algunha historia significativa que contar para a historia do colectivo da provincia de Lugo“, explica o membro de Colectivo Agrocuir da Ulloa, Adrián Gallero.
A convocatoria está aberta a persoas, colectivos e institucións, que poderán mandar as súas expereicnias a través do enderezo electrónico agrocuirsaulloa@gmail.com. A partir do recurso interactico, tamén se creará unha exposición itinerante polos museos que conforman a Rede Museística Provincial e un roteiro pola cidade de Lugo que una os lugares que son escenario da memoria LGTBIQA+.
A iniciativa, na que tamén colabora a Cooperativa Indaga, pretende visibilizar a diversidade sexual. Ademais, a vicepresidenta da Deputación de Lugo, Maite Ferreiro, incidiu na importancia de “construír relatos propios vinculados ao noso territorio e especialmente ao rural, que teñen un papel fundamental na construción da identidade colectiva”.